السبت، 11 أكتوبر 2014

---بحلم بوطن / على عبد العليم-----


---بحلم بوطن / على عبد العليم---------------------------------
مسجونة فيك
كلمتك
حتى الصراخ
محسوب عليك
كل الخطاوى
ف حسبتك
مرسومة بخطوط
من إيديك
إياك تكون حابس
صراخك
أو تبيع نفسك
لنفسك
أو بحسبة
من غير حساب
تلاقيك فكيك
كل الحكاية
إننا زى القدر
مرسومة فيه
كل الخطاوى
والمسافات
والسكك
مرسومة فيه
حتى النهاية
اللى لا يمكن
تتحسب
فيها المعانى
المهملة
ولا حتى سنين
العجاف المؤلمة
ولا حتى لحظة أمل
فى ليلة ضلمة
معتمة
مسجونة فينا
كل الحكايا
المترتبة
فى ليل الألم
والهجر بستان الكلام
بعد النظام اللى اتحبس
جوا أنفاس الظلام
وليلة شتا
فى الحر
أجمد من كل صيف
لسايا بنده للخريف
يسقط عليا
ورق الشجر
تدمع عيونى
بنور القمر
لحظة أمل
جواها خوف
جايز تموت جوانا
لحظة ضعفنا
من غير كسوف
وجايز تموت جوانا
ضحكة الجبن
والخوف .....
ف عز الظروف
لساك يا حلم
موجوع بالألم
وسكاتى حالف
ينكسر
رغم اللى كان
ف المحن
أنده عليكى
بعزم صوتى اللى اتوجع
يا حلم بكرة اللى اترسم
بلون الودع
والشرنقة لفت
عيدان الغيط
ساعة البكور
عزفت طيور الكنارى
لحنها
المليان وجع
قالت حكاية حزنها
وإنها بتتغرب كتير
تدور على أكلها
وإنها بتبنى فوق
مخاطر الجبال عشها
لكنها
بتبات ف ليلها
بتحمل حلمها
إنها
تصبح تلاقى
فى الغيطان
اللى يسد جوعها
ويملى بطنها
حلم الغلابة كلهم
زى الطيور
حتة أمان
ولقمة تسد الرمق
وأمنية ميكونش كلامها
ف يوم غرق
أو حكايا مكتوبة
ع الورق
حلم الغلابة كلها
تلاقى وطن
يكون السكن
يكون الأمان
والمؤتمن
حلم الغلابة كلها
ترفع رايات الخير
بلاد المسلمين
ويكون لينا وطن
من غير حدود
من غير قلق
ونلاقى مصر الجميلة
بشعبها .... أجمل بلد
أجمل بلد
------------------------------
على عبد العليم
أكتوبر 2014م
مرسلة بواسطة في
التسميات:

ليست هناك تعليقات:

إرسال تعليق

الاشتراك في: تعليقات الرسالة (Atom)

music