:::::::: أنـــا مـوجـــــود ::::::::
يا ( ***** )
إنت سامعنى؟
إنت شايفنى ؟
طب في خيالك أنا موجود ؟
أنا باتكلم..أنا بتألم..
ليه بينك وما بينى سدود
ليه فاكر إنى في تفكيرى شخص مريض
أنا عندى أفكار وردود
ليه فاكر إنى في دنيايا حالى وحيد
أنا دنيايا ماليها حدود
ليه متجاهل قلة حيلتى
وفاكر إن الضعف طبيعتى
وهيخلينى عليك مسنود
لأ :: # نا موجود
ممكن مرة تشوفني حزين وضعيف
ممكن تسمع مرة كلامي تقول تخاريف
لكن كل ما فيا سلام أبيض من جوايا نضيف
واللى في قلبى لسانى يقوله من غير تجميل أو تزييف
ماشي طريقي وحالف أكمل ولو كان مقفول أو مسدود
:: # أنا موجود
أنا إنسان ليا إيدين وعينين وودان
ليا مشاعر ليا كيان أنا من حقى أعيش في أمان
أنا من حقى في نظرة حب. مش إحسان. أنا مش حيوان
أنا إنسان ( عندى مواهب عندى كلام )
يمكن ربى خلقلى لسان حاله متلجم أو محدود
لكن برضه
# أنا موجود
ياللى شايفنى عايش دنيا من الأوهام
وفاكر إنى بقول وياكم أى كلام
فاكر إن أنا عايش في التوهان
أنا عارفك أكتر من نفسك أنا شايفك أكتر ما أنا شايفك
أنا في حياتى مش محكوم لا بمال ولا سلطة أو عنوان
وكفاية إني مصالح نفسى ولما بتغفل عينى بنام
ولا مستنى حبيب يجرحنى ولا دايخ على ساعة سلام
ولا بجرى ورا مال يسرقنى ولا عايش دنيا الاحلام
أنا دنيايا عايشها لوحدى المولود فيها موجود مش مفقود
:: # أنا موجود
فاكر إنى ممكن أعرك؟
فاكر إن وقوفك جنبى لحظة هيقلل من قيمتك؟
طب ليه ناسى إن طبيعتى هى طبيعتك
وناسى إن أنا واخد صورتك
خليك فاكر زى ما فاكر لكن أنا مش هنسى وأقولك
إن أنا على صورته موجود فلو هتجود بناقص جودك
أنا بوجودى باثبت إن الله موجود
وعلى وجوده أنا مسنود
:: يبقي # أنا موجود
نفسى في حضنك ألقى قبول
ألقى مشاعر تحكى تقوللى إن أنا قادر مش مشلول
تحكى تقوللى إن أنا شايف مش توصفلى ضلام مجهول
تحكى تقوللى إن أنا عارف مش تفكيرى مريض معلول
لو تشاورلى هافهم قولك ورهن إشارة هاجيك علطول
أنا محتاجك تفهم إن أنا ليا حياتى اللي هاعيشها
ولو حتى مليانة أسود
:: # أنا موجود
محمدأبوالحسن
ليست هناك تعليقات:
إرسال تعليق