صديقى شاعر العاميه....
اكتب فصحى
اكتب نثر
او بالعاميه
بس الكلمه تكون حقيقيه
ارسم صوره لناس ملمومه
على طبليه
ناس قاعدين ياكلوا ملوخيه
واختار اجمل كلمه نقيه
من لهجتنا المصريه
تقول بدويه
تقول صعيديه
اهى كلها برضوا عربيه
فيه عاميه متنقيه
مش اخطاء املائيه
ووزن نغمك حبه شويه
قول مشاكلنا عن قطع المايه
والكهربا هربانه اهيه
ناس وجعانه ومتغطيه
ومن ذلها ساكته ومخفيه
فيه عاميه جميله رقيقه
تنفع مرهم جوا عنيه
تسمع نغمة ناى تتجنن م الاغنيه
تسمع سومه ويا حليم او حتى بهيه
تسمع لجصر عقلك يفهم التسميه
وشمس بلدنا ونورها الدافى بالحنيه
قول عاميه واركن ضهرك على صفصافه
جنب المايه نازله بتغسل الف ضفيره فى قلب المايه
قول للنيل والنخل العالى تعالى عليه
احكى بلدنا فى مليون سبحه راضيه
وقول مصريه...ملوا عنيه بالحنيه
كلم احلى حبيبه بس تكون مستنيه
تسمع منك كلمه هنيه
رقه وذوق بحر شهامه ومفهوميه
ازرع زرع فى ارض طريه
ارض عافيه
مش تزرعلى فى بطن المايه
واعرف ان الكلمه امانه ميقلهاش
ابدا ولد هافيه
جدد معنى ومغزى لقولك بالعاميه
خلى كلامك نور بينور روح منسيه
وتصحى تفوق من كلمة حق
مادام كلمه حقيقيه
متع قلبك وانسي شويه
دندن عودك فى الفجريه
وشوف الشمس طاله تصبح
احلى صباح فى الصبحيه
بقلم ///جمال محمود.....
ليست هناك تعليقات:
إرسال تعليق