...::::: الألــبـــــوم :::::....
فتح الألبوم اللى تملى
مابيفتحهوش غير مع نفسه
وبدأ يتكلم كالعادة
وكأن الصورة دى بتحسه
كرر أسئلته المعتادة
وبدأ يتكلم مع نفسه
أول أسئلته ودا العادى
إزيك ياحبيبتى وفينك؟
وإزى أحوالك في بعادى
وعينيا إزاى مش واحشينك؟
إزى جراحك في الفرقة
أخبار الدمعة اللى في عينك؟
إزى الشعر اللى تملى
منكوش منك غصب عنك
والضحكة الصافية اللى في عينك
بتخليني أقرب منك
إزيك وإزى طفولتك
اللى مصغرة دايما سنك
كالعادة بيوصل للصورة
اللى تملى بيبكى قصادها
كانت جنبه في نفس الصورة
وبتضحك ماهو أبو أولادها
دول كانو خلاص بقوا أسطورة
دلوقتى بيبكى علي بعادها
قفل الألبوم نفس القفلة
وبنفس الدمعة اللى في عينه
خرج لأصحابه وكان ساكت
وصورها كانت سامعينه
مهو أصل محدش في الدنيا
راح يوصل إيه بينها وبينه
محمد أبو الحسن
ليست هناك تعليقات:
إرسال تعليق