غزة بقلم حسين الامبن

غزه
هما عايزين منا إيه
بيضربونا فى غزه ليه
هو معقول الحجاره
تقدر تقاوم قنبله
و الا حجاره صغيره
تقدر تصد يا ناس صاروخ
يا خلق هو :
قوموا إلحقونا
حوشوا اليهود اللى إفتروا
و الله علينا
بيضربونا بطياراتهم اللى
طايره بتعادينتا
بيدخلوا بالدبابات ويقتلونا
قصاد عينينا
و إحنا قاعدين ننتظر
مستنيين يمكن فى يوم
مدد يجينا

بيضربونا بالقنابل..
موش عارفين القنبله دى
رايحه فين
نازله فوق طفل بيرضع
صدر أمه
نازله فوق طفل جارى
يستخبى فى حضن أبوه
نازله فوق طفل ماشى
ويا أخته
نازله فوق طفل كان بيلعب
ويا أخوه

و الا الصاروخ
راح فين الصاروخ ؟
نزل الصاروخ فى وسط بيت
أهله كانوا بيستعدوا للعشا
الأب قايم يستعد للصلاه
و الإبن شايل أبريق الوضوء
و البنت رايحه تساعد أمها
اللى بتطبخ أكلها بفن و ذوق

و فى لحظه :
إتساوى كل حاجه بالتراب
نزل الصاروخ فوق العمار
خلاه خراب
شوفتوا إزاى إتحولت
حياتنا لسراب
شوفتوا إزاى إتحولت
حياتنا سراب
شوفتوا الدمار اللى بيخرب
فى الديار
و إحنا قاعدين نستخبى
تحت إنهيار
آخر سكوتكوا يا خلق إيه !
ده و الله عار

شوفتوا الصاروخ التانى راح لفين !!
راح فوق أهالى قاعده تتونس بناس
و فوق شفايفها بسمه بتضحك للحياه
و أخد معاه كمان شيوخ ويا شباب
دخلوا فى جامع يستعدوا للصلاه

بكره ها ننسى غزه
و اللى جرى فيها
زى ما نسينا زمان
صبرا و شاتيلا
زى ما نسينا قدسنا و أقصانا
زى فلسطين
و نلقى الدنيا واخدانا

رجعوا تانى يفكرونا
ببحر البقر
رجعوا تانى يضربوا
فينا الغجر
إصحوا بقى كفياكوا نوم
إنتوا الحقيقه يا بشر
ما أنتوش بشر

بكره ها نلقانا رايحين للعدو نسلم
بكف إيدينا و نتصافح بخدينا
ما احنا خلاص بلا كرامه
قاعدين بنتفرج
و هو قاعد يبيع و يشترى فينا
بقلمى : حسين امين