الاثنين، 23 فبراير 2015

(((( امبارح )))) بقلم // عبدالحميد المرسى


امبارح ، من وانا كنت صغير
وبرسم ع التراب شخابيط
وانقش بالتباشير هواجس
تتلون بيها الحيط
وبيجامتى الكستور جديده
وريحتها براءة قطاقيط
كان العيد بيشوفنا يزقطط
ومن الفرحه يتنطط تنطيط
والقرش ابو اتنين تعريفه
لابيض ابو لمعه خفيفه
بيجيب عسليه لشريفه
وخس وجرجير م الغيط
وامى ف سبتها تتسوق
من حلو وحادق ومروق
ولاعمر ماكنا نتشوق
على كعك وبسكوت وسميط
امبارح من وانا كنت صغير
وبرسم ع التراب شخابيط
القرش ابو اتنين تعريفه
اشترالنا حبة قراريط
النهارده ابنى الحرفوش
من جيبى بديله جنيه
ضمضملى ساعة البيه
وقاللى حيعمل أيه الملطوش ؟
قلت يابنى دول 100 قروش
ياما اشترولنا وبنولنا بيوت
قاللى اخفض يابا من الصوت
لايسمعنا اللى مايتسموش
وحكالى كتير روايات
عن مادرك أيه الألوفات
وقفت أعظم سلامات
لأرانب وحيتان ووحوش
وفتحت عنيا وأنا واعى
على سينما ومسرح وملاهى
ونت ودش ودواهى
سرق منّا زمن الطربوش
وهلت علينا الأخبار
عن يورو وجلدر ودولار
وموبايل وحبة أقمار
لموظف غلبان مغشوش
.........................
عبدالحميد المرسى



مرسلة بواسطة في

ليست هناك تعليقات:

إرسال تعليق

الاشتراك في: تعليقات الرسالة (Atom)

music