:::: مافيش نصيب ::::
هى قصة بنبتديها
بتبتدى مابتنتهيش
نظرة كلمة ثم كلمة
ثم وردة ماتتنسيش
تبتدى دايما صداقة
بتنتهى دايما مفيش
هى تحكى هو يسمع
هو يحكى وهى ليه
مرة تسمع أو تدمع
أصلها مبهورة بيه
إنتى أختى لا صديقتى
ثم حبك دبت فيه
يدخلوا في الحب قصة
بس مختومة بوجع
أيوا روحه وروحها حاسه
والعيون شوقها إتسمع
بس إمتى الحب مرة
والظروف مرة إجتمع
تنتهى الحدوتة دايما
إحنا بينا مافيش نصيب
واللى قاله قصده فعلا
إنه ناوى خلاص يغيب
بس أرخم كلمة قالها
بعتذر آسف هاسيب
الإعتذار أوقات بيوجع
أقوى بكتير م الجراح
والعيون مهما تدمع
مش هترجع باللى راح
الآسف وقت الفراق
طير ومكسور الجناح..!!
محمد أبو الحسن
ليست هناك تعليقات:
إرسال تعليق