أنا حظى من الدنيا
قلم وورقة تعبانه
وكام كلمة فى كراستى
وتوب على جته عدمانه
وليل قاسى بيحضنى
أنا وكام شمعه سهرانه
بتحرق بالساعات فينا
وباقى الخلف غفلانه
وجملة فى العيون تبكى
على ناس عايشه قرفانه
مانابهم حاجة من بدرى
الا كام لقمة متهانه
فيه الحبر من دمى
والسن فيه أنا وصوتى
ساعات يصرخ بكام كلمة
وساعات يحزن على سكوتى
وأخاف أقوله يا قلمى
بلاش تنوى على موتى
وترمينى فى سكتهم
تموت فيها شموس قوتى
دايما بلعب لى فى دماغى
لوشاف حاجة ومعيوبة
أو سمع بطون بتتخانق
على حقوقها اللى مسلوبة
أو شاف الشباب قاعدة
على القهوه ومحسوبة
وناس بتاكل من الزبالة
ومن بكرة ومطروبة
أو مرضى بدون أدوية
وأيدين بالصحة مغلوبة
واللى يمد ايدية للزمن
على حسنة ومكتوبة
كتبها نظام بالى
على ميت صفحة ومقلوبة
وعلى باقى صفحاتة
بشوف أحلامنا مشطوبة
ليست هناك تعليقات:
إرسال تعليق