واحد عايش بقا عادى بقلم الشاعر محمد القمري
واحد عايش بقا عادى
وبينادى
ومن جواه حنين هادى
بيخرج منه قال هيحب
وجتله الصدفه بالراحه
لقى الراحه
لقى الفرحه ضحك ضحكه
فقابل فرحه بغباوه
ماهو مشتاق
وباب الفرحه كان مقفول
واول ما اتفتح تكه
خرج منه حضن اشواق
لكنه خيال
وهم نفسه يروق الحال
وكان حمال
وياما شال على كتافه
ليالى طوال
بيستنى ويتمنى يكون مبسوط
سنين الضحكه من غير صوت
ولا احساس ووسط الناس
بيخدعهم بقا ببسمه
مجرد رسمه عالشفه
وكاس الدنيا رايح جاى
يصيب النفس بالكسره
لاهو عارف لفين رايح
ولا لاقى النجا فرصه
واحد عايش
مابين امانيه واحلامه
وف الماضى فلان خانه
وقع عالارض كان مرمى
جريح وف وسط احزانه
لكنه مماتش
فضل عايش لهذا الوقت
وخبى جروحه والامه
وقابل مر ايامه
بضحكه حزن بتموت
الباقى ف احساسه
وعلق كل اماله
رضى بحاله
وكل الدنيا بتغنى
وهو الحزن مواله
بيخرج من زقاق لمدق
وياما الدنيا شبعت زق
ولما ف يوم يا دوب يفرح
ترد الدنيا برضو ب لاء
كانه مالوش نصيب فيها
ولا يتهنى ولا يرتاح
يادوب يسرح ف غناويها
تشده الضيقه بعد براح
واحد عادى
وعاش هادى
وكان بيناجى صوت مكبوت
واحد ماشى
كيان فاضى
بيرمى الضحكه جوا تابوت
ليست هناك تعليقات:
إرسال تعليق