مين المسئول
شفت ريحانه وأغلى ريحانه **
ف عمر النرجس والياسمين**
وجه جميل ..وعنيها بريئه **
فيها جمال... كلّ البساتين**
أمـّا تشوفها هتنسى الدنيا **
أجمل من كل ّ الرياحين**
...........................
أمـّا الخصر ماعندى اوصافه**
زىّ حورية سمائيين**
مش هتصدّق لمـّا أقول لك**
نزلت دمعتى ع الخدّين**
هـِيـّه دقيقه ورحت احاورها**
صباح النرجس ع الحلوين**
صباح الز ِفـْتْ ياسيدنا الافندى**
شوف الصبح رايح على فين**
...............................
عـَرْضْ قـَفـَاكْ وقـَوَامْ ورّينى**
نفسى أشوف خـَطـْوْ الرجلين**
لمحت شافت دمعه ف عينى **
ف وجه مسالم.. بس حزين**
من غير غش ّ وما بيتصنـّع**
ظـَهـَرت ضحكه على الخدّين**
قالت مابلاش تزعلّ منـّى**
أصلى يتيمه بدون جناحين**
.............................
قلت يابابا إيــــــــه خلـّاكـِى**
ف وسط زباله على الجنبين**
شايفك قاعده تقلّبى فيها ***
وانت مكانك أصلا ً فين**
قاعده ف ريحه ماهى مـُريحه**
يا أجمل زهره فى البساتين**
ريحة الفضلات حاويه نشادر **
غلبت على سمّ الثعابين**
...........................
قالت قاعده با لمّ وانقـّى **
بلاستيك . خـُرده . أو رغيفين
جيت من سبعه الصبح ياافندى**
يعنى بقالى يادوب ساعتين**
جالى سؤال وسألته لنفسى **
ربـّى هيسأل عنـّك مين**
.............................
كُلـّه بيجرى علشان لـُقمه**
حبّه شمال مع حبّه يمين**
كل ّ الشعب ف قلب الساقيه **
وناس بتدوّر مش لاقيين**
..............................
كان فى الجيب ورقة نقديه**
كنت شايلها أجيب قميصين**
قلت ياشاطره الورقه هديـّه **
لو رافضاها انا هابقى حزين
شافت الورقه قوام وخدتها **
وظهرت بسمه على الخدّين**
يحميك ربّى ياسيدنا الافندى **
ويكفيك شر ّ الناس وا لعين**
..............................
قلت انا عايز اقول لك كلمه**
عايشه ازّاى وكمان مع مين**
قالت عايشه ف قوضه أ ُمـِّى**
أصلها ماتت من شهرين**
حارة حمزه جنب القهوه **
وكمان عايشه مع الأختين**
أخت كبيره الناصيه الثانيه**
قاعده تدوّر على رغيفين**
أمـّا حنان الأخت الثالثه **
دى فى البيت عندها سنتين**
...............................
أصل أبونا كان عجلاتى **
وحـَرَقْ نـَفـْسـُه عـَشَانْ الدَيـْنْ
ياللا يارابحه نروّحّ بدرى **
نلحق كرشة عمّ حسين**
يحميك ربّى ياسيدنا الافندى**
ويكفيك شرّ الناس والعين**
.........................
يااهل بلادى ..ياناسى الحـُرّه؟؟
يااهل الصفوّه وكـُل ّ أمين**
يااهل النخوّه وكلّ مروّه **
كشف بحصر على المساكين**
إنزل دوّرّ ....لـِفْ وصوّرّ**
تلقى كلامى تمام بيقين**
تلقى ف بلدك طفل مشرّد **
تلقى بـِغـَايا لجنس لعين **
تلقى أرامل مين هيجامل **
عاشوا ف هم ّ وغم ّ سنين**
تلقى بطاله كثير فى الحاره **
ف ناصيه وشارع والميادين**
تلقى كثير فى بلادى الحُرّه **
بيكوا هيبقوا كثير حلوين**
الشاعر/ يحيي المصرى
ليست هناك تعليقات:
إرسال تعليق