مين قال الشاعر واحد
الشاعر اصله اتنين
واحد حيران وحزين
يضرب كفينه في بعض
ما عرفش يجيبها منين
بينام زي الكتاكيت
ويسابق نور الشمس
يجري علي همه اليومي
يلحق دوره في طوابير
ممدوده لحد الصين
وفي اخر اليوم بيعود
مهدود ومحني العود
يادوبه يقوم مفرود
علشان هيقوم الصبح
يعيد نفس المشاوير
لو يهمس يوم في سياسه
يهمس بالصوت الواطي
انسان دايما بيطاطي
للريح لو جايه عليه
وواحد ذي العصافير
يموت لو عاش محبوس
والكلمة الواقفة في زوره
ينفثها جوه قصايد
بتحارب في الاباليس
بيعشق لون الليل
يقعد يستني الوحي
ينزله ويا النور
انسان ملبوس بالبوح
بيحب يعيش مجروح
علشان في الجرح بيلاقي
قصايد لامسه الروح
ميحبش اي قيود
دايما العود مفرود
فطبيعي اكون متناقض
وطبيعي اكون متقلب
اصل الشاعر مش واحد
الشاعر اصله اتنين
----- كريم ابراهيم --الصمت الحاااكى
ليست هناك تعليقات:
إرسال تعليق