مالك مخنوق ؟
انا مش مخنوق
الوصف الأمثل لأحساسى
انى انا محروق وجوايا شياط
واساسا مش حامل راسى
وحاسسها عمالة تضيق
جواها بنات مدبوحة عيونها بعياط
وعيال عفاريت بتحدف طوب
ورجالة كبيرة وبشناب
ماسكة مطاوى تقطع فكرى الكركوب
بقول الليل راح يرحمنى
القيه بيمسك فى خناقى
ويتفتون ع الفاضل منى
وبيلوى دراعى
ويعض فى قلبى وفى روحى
ما تحاول تهرب بالنوم !؟
للنوم شخصية متتهزش
بتحايل لكن ميردش
بغمض عينى لكن واعى
مش كل من غمض نايم
ولا كل من فتح صاحى
طيب فى ايه
وده كله اساسا جواك ليه
ما هو اغرب شئ
ان انا مش فاهم جوايا ايه
هو انا لو فاهم هتعب ليه ؟
----- كريم ابراهيم --- الصمت
ليست هناك تعليقات:
إرسال تعليق