دولت الأنونجية _- بقلم الشاعر محمد ضباشه

دولت الأنونجية
محمد ضباشه

تقسم على السيكا
ما تحرك وتر فيا
والصبا دا مش ليكا
ولا عدى نواحيه
تضرب وتر الـ دو
ألووو يا أفندية
يا اللى في سابع سما
بياتي يا عينيه
بياتي بيتنا هناك
لا زاد ولا ميه
ولا نخل طارح نغم
بشوفه حوالبه
ولا بيير نشاز أتردم
حلى النغم ليا
ولا صوت خليع أتكتم
بالقصد والنية
قلبت نغم نهاوند
رقص الحمار بيا
ورفص برجله الجوز
من طبلة معميه
قلت يا ماما حجاز
وعدى الليلة دية
قام الكمنجى بقوس
وكلام ملاغية
داست عليه الناس
وكأن ما فيه هي
فكرهت كار العوالم
ونغم
دولت
الأنونجية
----
السيكا – البياتى – النهاوند – الحجاز – مقامات موسيقية يعزف عليها النغم
الدو – نغمة من نغمات السلم الموسيقى
الأنونجية – من تعزف على القانون كأله موسيقية
دولت - حبيبة قلبي