يا مصر انا إنسان.. بيلعن كل يوم حظه
فيكى الضعيف متهان ..بيشتكى ضعفه
وبتقسى على الغلبان.. وبرغم من بؤسه
ولسه بدعيلك. .ينصلح حالك
بغنى مواويلك..وحفظت الحانك
تعبنى طول ليلك..اشتقت لنهارك
أيامى فيكى تمر ..عايش ومش عايش
والصبر فيكى مر ..من حزنى مش شايف
والحلو فيك يغر. .للمش عارف
أما الفيكى مزروع..بالعافية عايش فيكى
صعب أبات مخدوع..او أقول كلام يرضيكى
انا العشتى دموع ..ومت ميت مره
انا ال أخرى خضوع ..من جوه غير بره
رافع رأسى لفوق ..والعزه وخدانى
تشوفني تقول مغرور..بجاهى وزمانى
وفى الأصل انا مكسور ..وفيكى وحدانى
هيجى على الدور ..وابقى فى يوم أقوى
كان حلمى ابات مستور..مكنتش عايز سلطه
بس العرفته منك ..أنك تحبى القوى
وبرغم من سنك ..مش قادره تتعلمى
عمرك آلاف السنين ..قال مجد وحضاره
يبنيها الغلبانين ..ويعبدوا حجاره
ويموتوا حزنانين..ولاشافوا فى يوم غيرها
وملوكها منعمين..فى قصورها وفى خيرها
لامتى هتفضل روحى..تايه بعيد عنى
وانتى فى عز جروحى ..مزوده همى
ياساكنه فى ضلوعى. . متزعليش منى
إنتى عرفاني ..فى هواكى انا درويش
بس من القسوه ..مبيحلليش العيش
وأنا كده شايفك..ماشيه مع المهاويس
بس انا كمان عارفك ..ذى ماانتى عرفانى
لوخدتى فى يوم غطسه ..هتقبى من تانى
ليست هناك تعليقات:
إرسال تعليق