جوة العيون العاشقة بقلم/ ضحى أحمد

جوه العيون العاشقة لنوم النهار
سرداب منفد على عشق السهر
على أول السرداب .. مكتوب فرار
وفى أخره مكتوب .. ذكرى وقدر...
............
جوه ركن ف ذكرياتها
كاتبة اسمه بخط باهت
لما تتأمل خطوطها
هتلاقيها فجأة تاهت
لما تحضن أوردتها
تلقى دموع عنيها سالت
عاصرة شوق بيقول ياريتها
يوم ما عشقت ما قالت
.....
جوه ركن فى ذكرياته
راسملها صورة بالتمام
هى أآآآآخر أمنياته
وسناريو رسمى للأحلام
أيوة فى غيرها فى حياته
واحدة بيقولوا المدام !
مخلص جدا ليها فى ذاته
لمجرد _ بس _ الإحترام
...........
لما حب كان فى جامعة
أهله قالوا ده طيش شباب
أهلها اما لقيوها دامعة
قالوا نكتب الكتاب
ظنوا إن هيفرحوها
بزفة خايبة و قفل باب
فجرًحوه .. فدبحوها !
أخر أمل للوصل داب
...........
لسه شايلة فى رقبتها
سلسلة بحرف الغريب
جرب اسأل أجوبتها
خالية من كلمة حبيب
بس دقق فى ابتسامتها
شمس طالعة عشان تغيب
كل وجعها وحكايتها
متلخصة فى بند النصيب
.............
لسه شايل وسط حاجاته
صندوق معبى ذكريات
على اسمها واحده من بناته
وبيعشقها دى بالذات
هى حاجة من صفاته
دوشة فكر ف ليل سكات
كل سنين عمره اللى فاتو
عايش بس كأنه مات
.................
طيب ده يرضى مين ؟!
أنا مش هسأل عن ذنبها وذنبه
ولا هحكى عن
كسرة قلوب ناس حبو
أنا بس بسأل
عن ذنب واحدة شايلة إسمه
وذنب اللى هى شالت اسمه
ليه مشاعرهم يتقسموا
لناس عايشة فى الحنين !
طب يرضى مين ؟
ياللى قولتوا ده طيش شباب
الشاب شااااب
ولسه عايش جوة طيشة
مقفول على حلمه شيشه
ممنوع عليه يشوف النور
عمره بيكو أرض بور
أصله حتى صعب يحلم
يقابلها فى الجنة حور
ياللى راسمين بالكدب لون الخَضار
على قلوب أقسى من الحجر
جوة العيون العاشقة لنوم النهار
سرداب منفد على عشق السهر
على أول السرداب مكتوب فرار
وفى اخره مكتوب ذكرى وقدر