اللي جرى ما يتحكاش --- بقلم الشاعر/ محمد ضباشة

اللى جرى ما يتحكاش
للشاعر : محمد ضباشه
قابلتنى وشى فى وشها
دريت عيونى ماشوفتهاش...
قابلتنى كتفى فى كتفها
وخبطت فيها ما قصدتهاش
وسط الطريق فضلت ماشى
وعملت نفسى ماعرفتهاش
وقفت ونادت من بعيد
قلبى مشى ما استنهاش
مشيت ورايا بعيون بتبكى
مشيت وقلبى ماتهزناش
باعت وخانت حبى ليها
وضيعت عمرى ببلاش
وقلبى اللى حب قربها
أخدت حلاوته وماكفهاش
روحت أفكر من جديد
وأتمنى أنام والنوم ماجاش
ياما توهت فى دربها
أصرخ وأنادى مايهمهاش
أمسح بيدى دموع عنيها
وهي لجراحى ماتداويهاش
ياما أرتميت على كتفها
حتى بكايا ماشدهاش
لو هيه نسيت غدرها
عمر الجراح ما بتتنساش
كفايه منها اللى جرى
واللى جرى مايتحكاش