يوميات مواطن
هقولك حكايتى واحكيلك قصتى
ياما نفس اكل واكمل وجبتى
وابطل اجيب على قد ماهيتى
باكل واشبع اول الشهر
وابدا اجوع من يوم 10 فى نفس الشهر
واجى اقولها متسمعش
وتقولى مش هنصدق متحاولش
ومش هنقتنع متبالغش
لا انتى مصدقة بس معتيش عارفة تعملى حاجة
اصلك من الاول خالص اديتى لشوية ناس كل حاجة
هم يعيشوا واحنا مش مهم
كل حاجة بالنسبالنا مش مهم
ونقولك معندناش كهربا
تردى وتقولى مش مهم
مفيش غاز ولا انبوبة بوتاجاز
مش مهم
ساكن بالايجار والعيشة نار
والاسعار مولعة ومفيش سولار
برده مش مهم
طب زوديلى المهية
دا انا عندى 2 فى الثانوية
لا مفيش
طب مونيلى العربية
نفسى افرح بيها شوية
برده مفيش
طب شوفيلى شقة تأوينى
واى تبقى حاجة تقوينى
لا برده مفيش
مفيش مفيش مفيش مفيش
بقا كل حاجة تقولولنا مفيش
وكل حاجة ناقصة دا ان مكنش مفيش
هو احنا حرام عليا نعيش
مفيش ناس عايشة فى فلل
اشمعنا احنا بيوتنا عريش
وناس من غير علل
واحنا الفقر خلى صحتنا مفيش
طب ازاى هنعيش سلام
والقلب والضغط والسكر بلاش يعيش ؟
عيش يامرض وكل فى جتتى
ومش انا لوحدى انا عاوزك تجرى وتملى حتتى
ماهو الظاهر ان احنا ملناش لزمة
واهو نموت من المرض
احسن ما نموت من ضرب الجزمة
وسيبهم هم عايشين ى خيرنا
ومفيش وراهم حاجة غيرنا
ويقولولنا ملناش دعوة بغيرنا
طب ياريت ملهمش دعوة بغيرهم
طب اسال كدة على اكل المال
هتلاقيهم ياكلو مال غيرهم
طب اسال ع الظلم
اه برده يظلموا غيرهم
طب التكبر والتعالى
يدوسوا على رقابى غيرهم
اما الهم هيشيلوا همهم وهم غيرهم
احنا والله ماعاوزين حاجة منهم
بس يسترونا
ولما نعيا يعالجونا
وفيها ايه لو علمونا
مش يمكن نعرف عنهم
ونطلع احسن منهم
واهم يأمنوا مستقبل عيالهم
ماهو احنا برده هنبقى شغالين عند عيالهم
ماهو طالما مفيش ضمير عند اللى ماسك الميزان
يبقى لازم يطلع واحد قوى وواحد غلبان
واحد يشبع وواحد يفضل جعان
واحد يفرح وواحد يموت زعلان
واحد مطمن وواحد يحلم بالامان
واهى ايام وبتعدى
يوم بتجرى الساقية بينا ويوم بتهدى
وادى احنا مربوطين
متغميين وساكتين
عايشين وراضيين
متعرفش ان كنا ناسيين
ولا خايفين ولا مستهبلين
عايشين وخلاص
نستنى ييجى واحد عنده ضمير واخلاص
مع ان كل اللى بييجى مبيهموش
بس الحق برده علينا
ماهو اللى ميدورش على حقه ميستاهلوش
اصحى ياشعب كفاية نوم
حسس الناس دى بينا يوم
قول للناس دى كفاية
قوم قولها فى وشهم
يمكن نخلص منهم
يمكن واحد عنده ضمير
يسمع ويعمل تغيير
يمكن يخفوا لنا الاسعار
ولا يوفرولنا السولار
يمكن نلاقى عيش
يمكن حتى نعرف نعيش
يمكن يحقق حلم زمان
ويعاملك على انك انسان
هقولها واجرى على الله
عشيتنا دى مش عيشة
سقف بيتنا بقا عريشة
ويانلحق نخرج وناخد حقنا
ياهتقع على دماغنا العريشة
هو احنا مش بنى ادمين ؟
طب ادميتنا دى فين ؟
حريتنا فين ؟
كرامتنا فين ؟
وحقنا فين ؟
ماتردى يابلد
اللى سارقنا مين
واللى ناهبنا مين ؟
والحق فين وعلى مين ؟
الحق علينا اننا ملكناهم ؟
ولا الحق علينا عشان صدقناهم ؟
ولا الحق عليهم هم عشان مبيحسوش ؟
ولا الحق برده عليهم عشان مبيكسفوش
طب لو الحق علينا نعمل ايه ؟
وانتى واقفة تتفرجى وساكتة ليه ؟
مش لما تسبينا تسبينا فى ايد تصونا ؟
مش ايد تخونك قبل ماتخونا
اه تخونك
امال لما يهدموا حضارة 3000 سنة ده يبقى ايه ؟
مش خيانة ؟
ولما يبيعوا ارضك ده يبقى ايه ؟
مش برده قلة امانة
الاولى بخيرك مين ؟
احنا ولا الخاينين ؟
مش احنا اللى حررناكى زمان؟
واحنا اللى عمرناكى كمان ؟
واحنا الشعب اللى عاش فيكى جعان ؟
مش احنا اللى لما بتكونى فى ضيقة بتلاقينا مدينلك ادينا ايد ايد ؟
وكله يتمنى يموت فداكى شهيد ؟
مبعايركش ولا عاوز منك اجرة
انا بس بفكرك انك كدة مش هتلاقينا بكرة
هتلاقينا ازاى وهتلاقى مين ؟
هتلاقى واحد عاش عمره كله يتعلم
ولما اتخرج بقا صنايعى والبصمجى هو اللى معلم ؟
هتلاقى واحد شقيان طول عمره مرتاحش يوم
ومش عارف يجيب لنفسه حتى اوضة نوم ؟
هتلاقى واحد شغال فى قصور
وهو باب بيته عليه مكسور ؟
ده من خد وادى صار المال ماله
وانتى بتاخدى ومبتديش
اخدتى صحتى ولما عييت معالجتنيش
اخدتى عمرى فى العلام ولما اتخرجت موظفتنيش
حتى لما اشتغلت عند الناس مسبتنيش
باخد شوية قروش وقال ايه اسمها ماهية
ولو اشتغلت بجنيه الاقيكى عاوزة 100
ايشى كهربا وايشى تليفون وايشى ميه
والاسعار اسعار سياحية
والرضا والشبع بقوا شعارات وهمية
وكاننا موجودين كمالة
وعايشين فيكى زيادة عمالة
حياتنا كلها مليانة زبالة
كل حاجة فى حياتنا زبالة
تعليم زبالة
صحة زبالة
حتى الامن زبالة
فهمينى بس متسكوتيش
ليا حق عليكى ولا مليش ؟
ولو ليا حق فين حقى ؟
انا والله ماعاوز غير حقى
عاوز لما اروح المدرسة اروح بجد عشان اتعلم مش عشان حتة شهادة
عاوز احس فى حياتى بحاجة ليها افادة
عاوزك لما اتعب تداوينى
وعاوزك لما احزن تواسينى
عاوزك تحبينى قد مابحبك
افتحيلى قلبك وخدينى فى حضنك
حسسينى مرة بالامان
ورينى الخير اللى بسمع عنه من زمان
عيشينى فى خيرك
بلاش تكرهينى فيكى وتحببينى فى غيرك
ما انا كدة مش قاعدلك فيها
مع انك اولى بشغلى من غيرك
وانا عارف . بس هم عندهم عدالة
وكله له هناك له حق
رؤساء ومديرين وعمالة
مش بلد خيرها لناس وناس لا
لما ابقى شغال بدراعى 12 ساعة وماهيتى 200 جنيه
وواحد قاعد ع المكتب ماهيه 20.0000 جنيه
وله سواق بعربية على حساب المصلحة
والعمال تتذل وهى جاية ووهى مروحة
وهو مكتب بسكرتير وتكييف
واحنا من الخنقة والحر بنجيف
وان تعب يسافر برة على نفقة الدولة يعالجوه
واحنا اللى يتعب منا حقنة مسكن م التامين الصحى بيدوه
ياخد شاليه ع البحر عشان الاولاد
واحنا اللى يفكر يتفسح يبقى يقف على نفسه حداد
كل حاجة فيكى ماشية بالعكس
ناس غرقانة فى اللحمة وناس بتاكل عدس
ناس من كتر الاكل انفجرت بطنها
وناس من كتر الجوع بتاكل بعضها
وواحد كل 6 شهور بيغير عربيته
وواحد تانى مش لاقى حتى اجرة سكته
وواحد عشان ابوه فى منصب مش ملاحق
وواحد تانى بيحلم ياخد فرصته
وواحد عنده شاليه فى العجمى وفيلا فى مارينا
وواحد تانى بيحلم بحتة كابينة
وواحد يضربله 100 تعظيم سلام
وواحد تانى وشه اتقطع من ضرب الالام
وابن الوزير يبقى سفير
وابن الفلاح يدوب غفير
ده يبقى ايه ؟
لما التعليم فيكى يبقى فى الدروس الخصوصية
والعلاج فيكى يبقى فى العيادات الخارجية
ده يبقى ايه ؟
بصى انا هقولك ع المشكلة بس انتى متنفضيش
طول مافى ناس عايشة فى فلل وناس تانية بيوتها عريش
وناس بتاكل كافيار
وناس بتاكل جبنة قريش
عمرنا ماهنعرف نعيش
وعاوزة تعرفى مالى
اطمنى ياستى مفيش
مفيش ضمير
مفيش اخلاص
مفيش داعى حتى نعيش
مفيش حاجة مفيش
ليست هناك تعليقات:
إرسال تعليق