نشاز بقلم الشاعر عبد الغني عبده
يا غنوة يا منسية!!
محلاكي ع الصبحية...
كمثل زهرة فل متندية...
الغنوة م الفجرية صاحية تناغي.
كطفلة في اللفة وبتغاغي...
وتصاحب الفلاحة والفلاح...
وتقول مع العامل: صباح فتاح
تركب فلوكة صيادين؛ وتلاغي...
بنوتة فـ المشربية...
وعنيها رايحة وجاية...
للوعد مستنية...
وحبيبها م البعد لاح؛
أسمر وحامل سلاح...
بيحارب الباغي.
يا غنوة والزغرودة صوت متعافي...
والطبلة ع الزراعية دايرة "تعافي"
والسعد وعد للي توبها عفافِ...
يا غنوة يا ماحلاكي فـ العصرية...
يا فرحة المولودة والمولود...
والغايب أما يعود...
عصفور وراجع لعشه فـ المغربية
والغنوة زقزوقة
تلحم فـ طقطوقة...
ودخلنا سهرة بعد أمسية
يا غنوة يا طربية....
يا مكربجة قلوبنا بألحانك
وملسوعاها بصهد أشجانك
يا غنوة راحت عليكي...
والفل راحت عليه؛
ولا عادش في الصبحية
من تمسكي فـ إديه!!
واتهدت المشربية...
ومكانها برج "السلام"...
وسلام للباغين!!
يا غنوة يا متفجأة بالثورة
وتمللي تيجي لاحقة مش سابقة...
ولا عمرك اتنبأت بالخارجين...
يا غنوة يا منسية.
يا غنوة والناي حزين
يبكي مع الموجوعين
يفرش لموال قديم
موال بهية وياسين...
وليل يسلم لعين
والغنوة منسية
والناي بيحكي... حزين؛
فـ حكاية أبدية...
فارس ملثم همام؛
اجتاز بحور الظلام...
صادف كتير أهوال؛
من أجل جنية!!
داير كما المسحور
وعنيه بتتملى
في شعرها الغجري
وجسمها البللور...
قدم لابوها كتير؛ لم ينفع!!
والحب خللى القلب هيولع
يا غنوة منسية...
ودخلنا سهرة بعد أمسية!!
يا غنوة والمزيكا بتلعلع
تسمعها بنت شقية تتدلع
وبالصجات ترقص وتتشخلع!!
ولبانة جوه البق بتطرقع
والغنوة منسية...
ليست هناك تعليقات:
إرسال تعليق