ياحبي....يابلدى.....ياولدى
ياحلمي....وعلمي...وسندى
يا أسمى المعاني....ياعمري
يابدر وسط الكون
متعلقه بيه العيون
ومهما ان كان
حبك صعب
طريقك صعب
لاهنا ولابتهون
دى كفايه ضلايه
تحت صفصافه
و"جلابيه "شرحه فضفاضه
فى حر الصيف
وشربة ميه من قله ف صينيه
ولقمه هنيه
غموسها من عرق ايديه
وشمسة عصاري
ونسمة براري
وقت المغربية
يبقى الكلام موال
يتنغم ف الحان
يا ام الجدايل ليل
انت ساقيه ودوارة
ادوس يملا.....ادوس يفضى
وانت دايما نواره
وكل يوم عن يوم
حبي لك ياحبيي
يتسطر كلام
على جبين ولد اسمر وشغال
ولد عاشق هايم مع الآلحان
ولد ملان اصرار
معرفشى معنى المحال
وانا الولد
غزلتلك توب الفرح
من خيوط القمر
وطرزتلك من شعاع الشمس تاج
ونورتلك الكوشه بضوء القمر
ولبستك توب الفرح
بعزم قلب انجرح
لما شاف مره
دمعه حره
على جبينك
شلت حزني
شلت همي
وقلت يلا يا بلدى همي
وامسحى الدمعه الحزينه
مش هيه دى الحقيقه
ولابقينا فى زمن الكدب...!
ــــــــــــــــــ
رجعت يا ماي لزمان وأيام زمان
لما كنتي تاخدينا
تدفينا
بين دراعاتك ف احضانك
كنت احس
الشط والبحر والمرسى
والليل .....والقمر .....والسهر......
ولا انسى الحواديت
على المصطبه فى البيت
والشاى وقعدة الصحاب فى الغيط
واوعى الكلام ولا انسى
علمتينا الكلام يكون م القلب
وعمر اللسان مايوم يقول كدب
علمتينا ع الطبليه
الكل فى حب
فين ايامك
ولا بقينا فى زمن الكدب!
ـــــــــــــــــــ
يامه....... ياماى
قلبي..........
توبي الآبيض
ابيض......
لسه بينبض
فيه وصيه .....فيه بقيه
رغم التيار ياماى
بيهد جسوري
بيجرف شطي
بيزلزلنى
بيسرق مني الانسان
اللى عايش جواي
واللى اتربى معاي
بيسرق منى
وصاياك
بيسرق منى كلامك
فين ايامك
ولابقينا فى زمن الكدب!
ـــــــــــــــ
الشريف صلاح شعبان.
الف شكر لجنابك استاذ محمود تشرفت بكم ودمتم بالف خير
ردحذف