**** أنا الكسبان *****
**************************
**************************
أنتى أختارتى السكة التانية
بعتى العشرة قفلتى الباب
هديتى اللى ما بينا ف ثانية
علشان وهم ف اصله سراب
قلت أنا لسه باقى عليكى
نرجع تانى نعيش احباب
ابقى الشمس وضى عينيكى
ويفتح قلبى ليكى الباب
بعتى وقولتى خلاص مش فارقة
ما نتيش قد عذاب الفُرقة
فكرى لحظة الله يخليكى
مش راح ينفع تندمى بكرة
الايام إللى عشناها
شفنا قساها وعيشنا هناها
قامت تجرى تنادى عليكى
وانتى يا بايعه مش سامعاها
تسمحيلى بس هاأقولك
إللى ما بينا حب كبير
كنت النسمة وربيع ضلك
وياما قولتى عليا أمير
فاكره أنى ها توه من بعدك
ولا عنيا ها تبكى عليكى
عمر الشوق ما ياخدنى ل عندك
أصل أنا قلبى حالف ينساكى
قلبى دا كان نبع آمان
دُستي بقسوة وحبى انا هان
مش راح افكر واسرح فيكى
قلبى نسيكى وانا الكسبان
*****************************
*****************************
سامى أبو الغيط
___________________________
___________________________
ليست هناك تعليقات:
إرسال تعليق