تقول إبعد بقلم الشاعر هشام عبد الجواد مشالي
تقول إبعد
اقول طيّب
تقول إرجع
ما انا قريّب
وترجع تانى
تنسانى و بتغيّب
لو انسى مره
وانده لك
تلوم على قلبى
و تعيّب
وايه ذنبى انى صارحتك
بأسرارى ودبت انا فيك
وقلبى كان بيشكى لك
و حن اليك
وياما بنيت قصور م الوهم
وعاش العمر يجرى عليك
---- ------ ----------
انا د الوقتى بنده لك
بصوت عالى
معتش عندنا غالى
يا ريت ترحل بأحلامك
يا ريت متجيش على بالى
وخد روحى كمان وياك
وسبنى لوحدى انا ف حالى
عذابى وهمى كله معاك
وقربك يوم ما بحلالى
------- ------ ------
أقول ابعد واعيش من غيره
بس كلام
ينادينى يغيّر حالى
وانا صاحى وفى الاحلام
لاهو الرمش عمرك شفته
غير فى العين ؟
وعمرك شفت زرع اخضر
بيكبر غير فى ميه وطين؟
ولا بنشم اجمل ريحه
غير م الفل والياسمين؟
وعمر الورد ما بيكبر وبيفتح
وهو بعيد عن البساتين
وعمر الدم ما بيجرى
فى غير شرايين
وعمر الشعر وقصايده
ما يبعد يوم عن الدواوين
وعمر الحب ما بيعيش
بدون قلبين
وانا مأدرش اعيش البعد
لو ثانيه
انا مستنى تنده لى
بقالى سنين
وانا من غيره متحير
واروح على فين
ليست هناك تعليقات:
إرسال تعليق