( في عتمة الإحساس)بقلم الشاعر الطيب عوض احمد
ماشيه أتحسس مكان أقدامك
يمكن ألاقى طيفك بيحضنى
حتى البحر حاسس غيابك
وأنت بعيد سكوته بيألمنى
كان شاهد على أجمل حكايه
كانت الأمواج بترقص وأنت معايه
كان الكل بيحسدونى عليك
دلوقتى مفضلش منك غير بحر ساكت
حتى علامات القدم
حرمتنى منها ميته لما ارتمت على الرمال
مفضلش منك غير كلامك
لحن صوتك فى الكلام
كلمة بحبك وانت عمرى
ولما بضحك تبتسم
واتوه ساعات العمرفى وسط الزحام
ما هو كان حب زحمه
حب مليان بالالم
حب عارى حب خالى من الدسم
انا وانت ظلمنا الحب
اصلنا معرفنهوش
كنا فاكرينه ضحكه ولا حضن
او حتى مسك ايد
الا ان الحب اسما من كلامنا
الحب يعنى عطاءحتى فى الالم
يعنى عشق بيتولد من العدم
يعنى خوفك على حبيبك
جوه عينك يترسم
كل اللى بينا مكنش حب من الاساس
كانت شقاوة قلب فى عتمة الاحساس
ليست هناك تعليقات:
إرسال تعليق