**و ليل مجروح **بقلم المبدع /فهمي علي **

**و ليل مجروح **
و ناس تايهة و من غير روح 
و ضحكة يتيمة بتدور القلب اللى لسه برئ 
فى الف طريق 
و لما تلف و تسافر بين المخاليق
بترجع تتقلب دمعة
و تملا عيون
و عشق يهون
و كلمة حب تتفرق ما بين سطرين
يضيع معناها ... تتغرب ما تعرف فين
و نجمة فى السما خايفة و قمر مجبور
فى روحه ضلمة مسجونة ... و طارح نور
و صوت مقهور
بينده و السنين خارسة ما بتردش
بتسرق عمر من عمره و ما تعدش
فيدبل كل يوم حبة لحد الموت
جنازة و السكات فيها خلف ليفوت
و ينصب خيمته على بكره اللى لسه ما جاش
نهار متحاش
و متكتف بخوف ساكن جميع من عاش
فى ليل مجروح
انينه بيوصف الحالة بدون ما يبوح
عشان وجعه حاجات قتلت جمال الروح
بقلم /فهمي علي