السؤال كان عادي جدا بقلم الشاعر محمود مصطفى
السؤال كان عادي جدا
كنت دايما بساله
الزمن لو كان هيرجع .....
ايه الي ممكن تعمله ؟
إلي قالي انا مش هأحب
وإلي قالي أرجع أذاكر وأجتهد
وهخش طب
والي بصلهم بضحكة
وقالهم طب بس كدب
و100 اجابه كانت عادية
بس وسطيهم اجابة زلزلت احساسي فيا
واحده قالت نفسي أرجع أسبوعين
وألقى نفسي في حضن أمي
وأقولها أوعي تسبيني
وحضنها يبيت في حضني
وأقضي طول اليوم معاها
عيني تشبع من عنيها
وأفضل أرغي كتير ساعتها
واقولها كام نكته بايخه
وبردو تضحكلي عليها
وأجيبلها الشاي الخفيف
ومعلقة سكر كفايه
أمي الي علمتني الشاي
كانت تشربه دايما معايا
وأقولها كفياكي يا أمي
ريحي جسمك شويه
أيوه هأعمل كل حاجه
سيبي شغل البيت عليا
يعني لازم كل حاجه تعمليها
الغسيل ويا الطبيخ ابرة خياطه
بلاش مكابره ..
ابرة ايه الي انت عايزه انك تلضميها
هو يعني اليوم دا بردو
يبقى زي سنين وعدو
ارحمي نفسك شويه
خلي حبة صحة ليكي
ييجو في الحض الي ليا
امي الي ماتت وقت غفله مننا
حتى في موتها
مكانتش عايزة تخضنا
ماتت ببسمة وميت شهادة لربنا
ملحئتش أشبع منها
يا أغلى حاجه بحبها
أعمل لمين الشاي خفيف
ومين يآنس وحدتي
يحرم عليا الشاي في بعدك
هأكتب بدمعي كلمتي
نفسي أرجع يوم لحضنك
وبعده تخلص دنيتى
ليست هناك تعليقات:
إرسال تعليق