#بار_الدنيا
انا واقف على بار الدنيا ..
بشرب والحزن عامللي كمين ..
قدام الشمس اللي اغتصبت في سواد الليل ..
ومافيش عنوان وماليش كنية ..
مش عارف هسأل مين انا مين ..
والصبح بيجري وبيجرجر في الليل مـ الديل ..
,,,
السما بتغير في وشوشها ..
يمكن تتعرف على وشي ..
بتعاني زهايمر بيحوشها ..
عن عد الوقت اللي بيمشي ..
,,,
فـ تعدي سحابه معبية ..
وتمطر ارواح من ماتوا ..
والروح اللي بتلمس فيّه ..
بترجع قلبي لـ دقاته ..
,,,
وان فوقت ارجع للبار اسكر ..
اتريق وانسى اللي بيحصل ..
واضحك من قلب ماهوش قلبي وبعمل مبسوط ..
نسيان الواقع مش منكر ..
قافلين السكه اللي توصل ..
تنصحني وجاي تسكر جانبي وجسمك مربوط ..
,,,
الشمس بتقلع في هدومها ..
وبتلسع عين اللي يشوفها ..
ذنبك تفاحة بتقطمها ..
والعيشه تخبيك في كهوفها
,,,
الايد اللي بتدّي بتضرب ..
واللي بياخد لازم يدّي ..
وتلاقي اللي فـ ايدك يهرب ..
اشكر في الوقت انّه معدّي ..
#محمد_عبدالله
ليست هناك تعليقات:
إرسال تعليق