كعب الغزال __ بقلم ياسر شرف-

كعب الغزال
========
فى فرن كده على قد الحال قلت اشترى لى حاجة فى الحال
ولقيت فى حاجة بطعم جنان بالعجوة يعنى كعب الغزال
وخيالى خدنى يمين وشمال وكانها صارت كغزال
بملاية لف وغصن البان وفى رجليها لابسة كده خلخال
وجميلة فى الطلعة والحال تمشى وتسحر فى الشبان
وتشبك قلوب فى الخطوة رجال وتكيد كمان ايها عزال
والطرحة محطوطة على الشال تطير تهفهف كده بجمال
ومع كل رنة للخلخال موسيقى بلدى تهد جبال
تمشى وتتهادى بدلال بحسن مذكور فى الامثال
وقلت انا عاشق ولهان لبنت بلدى احلى غزال
ومشيت وراها فى كل مكان فى حارة يعنى او دكان
وقلت لها يعنى التقل حرام وهى عالخاطر والبال
وضربتنى يعنى بالقبقاب وقالت لى عايز ايه يا هباب؟!
فاكرنى سهلة من الاحباب! اللى رايدنى يدق الباب
ويطلبنى من اهلى بجواب ويجيب لى فرخة وكيلو كباب
وقلت ليه ضرب القبقاب جرحى ودمى يسيل بعذاب
وكبست جرحى ببن كتير بحبهان مع جوزة الطيب
على اى حال ضرب الاحباب زبيب وبندق مع عناب
وقررت فورا اروح عالباب بدل مااخش من الشباك
وقابلت ابوها عم مهاب وزوجته يعنى الست رباب
ورحبوا وبكل اداب وقالوا لى انى لسه شباب
وبداوا فى حزمة من الطلبات تفوق وتكسر القدرات
وقالوا لى مهر بنات الخال جهاز وشبكة وكم خلخال
وثلاجة يعنى وتلفزيون وبوتاجاز ومكوة مع اى فون
ويكون فيه سيلفى ونت كمان وفيس تويتر وانستجرام
واجيب فى توك توك او ميكروباس وايراده ليهم وباخلاص
عشان افسح ست دلال ست العرايس واحلى غزال
والشقة تتشطب بالسيراميك بعتبة حمرا بعرف الديك
وحماتى عايزة طرحة وشال وفستان بترتر او حتى شوال
وقلت ده انا على قد الحال اجيب منين شبكة وخلخال
وقالوا لى اسفين ليك يامان اجرى وجمع كده فى المال
ولما تبقى حقيقى خيال تيجى وتطلب يعنى دلال
وقلت لخيالى يا عم جمال كفاية تاكل كعب غزال.
وقلت اكل فى نواعم وخيالى قال لى دى مزاعم
نفس الرواية ونفس الحال وكأنى منحوس بالاعمال
وقلت اجرب كده بالذات واكل فى مرة غزل البنات
وقالوا لى ارجع يا شحات مافيش خطوبة ولا شبكات
وجربت اكل رموش ستات قالوا لى برضه التعلب فات
كنافة وصوابع زينب قالوا لى اتنيل على عينك
واكلت برضه ام على وخيالى قال يااخى اتلهى
كفاياك فى اكل المخبوزات وحلويات بتوحى بالخيالات.
ده اخرتك كده بابا غنوج عشان ماتصحى بقى وتفوق.

مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون