أُمِّى
*********
لسه فاكر لما كنتى
بتشدى من فوقى الكسل
وبصوت انعم
من خجل البنات
وأحلى من العسل
إصحا يا ضنايا
وش الفجر اتغسل
واحمرت البلحات
واصحا من نومى الاقى
الف شمس
ساكنه حضنك
وتشيلينى جوَّا قلبك
القى نبضى كله عندك
فوق كتافك
كنت بفرش كل حملى
واقطف م السما نجمات
ولما شب طولى عنك
كنت شايف جوَّا ننك
الف حارس يحرسونى
وان هربت من عيونك
القى طيفك
بين جفونِى
ولمَّا ارجع القى
ضلك ويَّا همسك
بيلومنى
يا ابن بطنِى
كنت فين؟
100 سؤال من غير جواب
جوَّا صدرى بيخنقونى
ليه يا امى كتر العتاب؟
شيلِى من طوقى الحجاب
كنتى صابره كنتى رحمه
رغم قسوة قلبى ليكِى
بحرالحنين لو نشف
يجرى يشرب من إيديكى
لمَّا ديك الفجر يصحا
القى صوتك فيه ادان
حتى نورك وانتى ساجده
كان يسبح ع الحيطان
ويوم ما قالوا :
شد حيلك
والنهار لبس السواد
من ضلوعى
الشمس غابت
وف دموعى
توب الحداد
********************************
كلمات الشاعر / سليمان صالح احمد
ليست هناك تعليقات:
إرسال تعليق