رباعيات الباشا :: الشاعر /: محمد ضباشه

رباعيات الباشا
الشاعر : محمد ضباشه

ياللى سقتنى المرار
كسر بقى كاسك
وقدملى بأيديك الحلاوه
وفرقها على ناسك
هتبان ساعتها جدع
مهما الزمن داسك
وهيقولوا فعلا أصيل
وهتبقى عيونى حراسك
--
ياللى عايش وساعتك
ظابطها على امبارح
وناسى يومك وبكرا
وما بتفكر فى ايه رايح
يا جدع د أنا حته منك
مش لاجىء ولا سايح
نفسى يكون لك أمل
هتلاقى عبيرى حداك فايح
--
ياللى حبيبها كدا
وتوبك خيوطة الغم
قولى أيه بعدك أنت
فى الدنيا دى هيهم
أغسل مرار قلبك
ولسانك نضفه م السم
ورجع البسمة لشفايفك
ورجعنا معاك نتلم
--
ياللى بنضارة سودا
وفاكر أنها حجباك
وحاجبة عنى غرورك
وبجهلك فاكر حمياك
عن كل عيون البشر
ماعيونى عليك شيفاك
عريان ومن غير توب
وشايف كل شيىء جواك
--
ياللى تسوق الدلال
خلى بالك منى
مش عيب عليك يا جدع
ما تيجى تطمنى
وانا دايما بسأل عليك
وأنت شارد منى
بكرا الزمن يعدلك
ويعدل معاك ظنى
--
ياللى أنت عايش عشان نفسك
دوس على النفس وكفايه
وأوعى مظهرك يغرك فى يوم
وتشوف شكلك حلو فى مراية
المهم عندى بياض قلبك
هيكون لك حته جوايا
والقاك عايش بقلب دهب
وتبقى ديما جنبى ومعايا