أنا جاهل بأفكارى :: للشاعر المبدع أ / محمد ضباشه

أنا جاهل بأفكارى
للشاعر : محمد ضباشه

أنا جاهل بأفكارى
لكن عارف بلاويكم
وعلمى حبه على قدى
وفاهم كل خطاويكم
بنيتوا بالجهل كام انسان
بيغنوا غناويكم
وبنيتوا بالعلم كام انسان
ماعرفوا يحكوا حكاويكم
معادلة أكيد ومش صعبة
ماحلتها كراسيكم
أرقام أكيد بدون فايده
مغروسة فى كل أراضيكم
ما شافوا طرحها مره
ولا مره رسيوا بمراسيكم
والموج بجهله يبعدهم
عن شط فيه مراعيكم
وكأن جهلنا لعبة
بتورثوه للى بعديكم
--
أنا جاهل وفين علمى
يا اهل العلم سامحونى
وشوفونى فى وسط كام كلمة
واوعوا بالجهل تاخدونى
أنا مطرود من الرحمة
ومات علمى فعزونى
وسيبونى أعيش انا بجهلى
أطبطب على اللى حرمونى
واقول الكلمة بالمقلوب
واخاف للساسة يشوفونى
وأبان فى وسطهم عارف
د أنا والعلم نسيونى
--
أنا جاهل ومن جهلى
عايش فى البلد دى حمار
اشيل الكل على ضهرى
وفى ليلى بكون طبال
أطبل للى على الكرسى
وازمر للى كان زمار
واقول الله على فهمك
واقول الأه تولع نار
بس بقولها انا فى سرى
واخاف يسمعها اهل الزار
يرمونى فى سكة مش شبهى
ولا شكل رجال احرار
بقوا حمير فى يوم زى
ومالينا فى وسطهم ادوار
--
أنا جاهل خلاص ارتحت
ماراحتك والله تعبانى
بنام وأصحى وبحسبها
وكل الحسبة ألمانى
وبسمع صرخة من جوه
بتقول للكرسى اه يانى
بقيت جاهل انا بعلمى
ونار الجهل كويانى
بقيت جاهل ومن جهلى
عيون الجهل كرهانى
لا أنا عالم بقيت نافع
ولا جاهل بحرمانى
ولا عالم وأنا بشكى
ولا جاهل بكتمانى
أهديكم حبة من جهلى
وزهورى وكل بستانى