ادور عليها ما بين البشر
اقول بنت حلوة و رقيقة و قمر
على خدودها ضحكة
و فى عيونها سكة
و روح حلوة فكة
و عشق و سهر
بتهمس ... فغنوة
و حدوتة حلوة
و سحر ان صادفته
تتوه فيه سفر
بادور عليها فى بكره اللى جى
فى كام ضحكة حلوة .. فى بسمة .. فى ضى
فى صبح اما يبقى مفيش زيه زى
فى كام غنوة صافية و رنة وتر
بادور عليها فى لحظة صفا
فى حضن اتفتح لى
لقيت فيه دفا
و قلب بحنانه ما يعرف جفا
و ورداية صابحة رواها المطر
عشقت ابقى فيها
و اهاجر .. و اجيها
بنظرة ف عنيها
يتوب من كفر
ليست هناك تعليقات:
إرسال تعليق