أنا فلاح
*****
*****
فداكى يا مصر
مهما أقاسى و أقاسى
تعيشى يا مصر
علمك تاج على راسى
و لكن عندى كام شكوى
ها قولهم لك
ها فضفض لك
و لكن قبل ما أشكيلك
بأِوَصَّلْ لك و أهديلك
سلام أهلى
ولاد بلدى
ولاد الكفر و القريه
ولاد النجع و العزبه
ولاد ملياهم الطيبه
ف دنيا كلها ريبه
&&&&&&&&&&&&
&&&&&&&&&&&&
أنا فلاح و مش فالح
نسيت بكره مع إنبارح
و ِكِيلِى م الهموم طافح
و هَمِّى للعيال لقمه
و مترين م القماش هدمه
بعيد عن أرضى يااااا عاااااا لم
ما ليش لزمه
و أرضى هيَّه راس مالى
أنا و مراتى و عيالى
و أرضى من ضلالهم بووووور
لا جمعيه و لا ارشاد
و لا يا خلق لاقى سماد
و ميَّه تيجى بالتيله
و أعمل ايه ؟؟
ما فبش حيله
أنا ف الأرض ها أتكفن
آسيبها !!!!!
لاااااااااااااااااااه
دا مش ممكن
دى تبقى ف حَقِّنا عيبه
و تبقى خيبه بالويبه
&&&&&&&&&&&&
&&&&&&&&&&&&
و أنا عامل بيوميِّه
و ما لى معاش و لا ماهيه
و لا بطاقه علاجيه
و لو بنتى ف يوم تعبت
بكشف حكيم خلاص خلصت
علاج ؟؟
يا علااااااااااج و تيجى منين
أنا نَكِرَه ما ليش تأمين
أنا إسمى على الهامش
يا ناااااااااااااااااااس مكتوب
و لمَّا أموت
هيبقى م الكشوف مشطوب
و غيرى
م العِمَاله كتييييييييييييييييييير
أنا نموزج
أنا مش رمز
أن اللى قدرت أَوْصَلْ لك
و أَوَصَلَّ لك
أمانه إتْحَمِّلِتْ لِيَّهْ
رساله من كتيييييييييييييييير
زَييِّى
ياريتك شَايفَه بِعْنَيَّهْ
كتير م الخلق مَبْلِيَّهْ
و فقر و غُلبْ ..
مِرَازِيَّهْ
دا لو طوبه
ها تسأل ليه؟؟
و ليه مش حَسَّهْ إنك بِيَّنا
مغلوبه
يا منهوبه
&&&&&&
&&&&&&&&&&&&&&&
دا شعبك كُلُّه و اللَّهْ فقير
و لكن عنده عزة نفس
أنا جايلك على رجلى
بقالى سبوع و أنا ماشى
ما فيش أجره عشان أركب
و كيف أركب
وأنا صايم بقالى يومين
عشان جايلك
حِفَان ميَّه من المصرف
صَلَب طُولى
وِحَلِّفْتِكْ بِرَبْ العِزَّه لَتْقُولِى
لمين خيرك؟؟
لكام واحد من الألاضيش
عددهم كام ؟؟
ما تسألينيش
مش انتى عندك الاحصاء؟؟
مش انتى عندك الأسماء؟؟
ها أقولك بس أوصافهم
أكيد الكل يعرفهم
طيو ر جارحه
تعالب فى العقول سارحه
ديابه و النفوس غابه
وشوش كالحه
ملامح كلها كآبه
و فين ها تروحو يا غلابه ...
ف وِصت عصابه نصَّابه
و كدابه
وِ هُمَّا شبعانين تُخمه
و حاسدينَّا على اللقمه
و لقمه حاف
ما فيش جِبنَه
فِضِى جيبنا
حياتهم كلها لحمه
و إحنا ليه نشيل الطين ؟؟
عشان ساكتين ؟؟
و هٌمَّا حقِّنا ناهبين
و خيرك من زمان سارقين
يناس و اللهِ دى مصيبه
سألنا...........
قالوا دى ضريبه!!!!!!!!!
&&&&&&&&&&&&&
&&&&&&&&&&&&&
ننام نِتْهَنَّا بالأحلام
و نرسم بالأمل أوهام
نلاقى كابوس
وضعف نفوس
و أقولك إيه
و أعيد لك إيه
دَوَشْتِكْ
بس جيت أشكى
و أنا بأبكى
على اعتابك
أبوس بابك
و أمرمغ وِشِّى ف تُرابك
أنا إبنك ياااا أم الدنيا
إيه صابنى و إيه صابك
و إيه نابنى و إيه نابك
ما ليش غير حضن أحضانك
أنا راجع على بلدى
سلام و إديكى مفروده
لكل جبان
و ملمومه على الآخر
من الغلبان
أنا ماشى
على رجلى أنا ماشى
بَأوَصَِيكِى عشان ماشى
عدوك داؤه ف نيابك
أفوتك يا بلدنا بخير
يبارك ربنا فيكى
سلام ياااا أم كل الكون
يا كل الكون يا محبوبه
***************
أحمد السباعى
***********
ليست هناك تعليقات:
إرسال تعليق