ألوان باهته فى حتتنا
محمد ضباشه
1-10 -2010
تعالى يا صاحبي معايا نشوف
ألوان باهته بقالها زمان
بشوفها كتير في حتتنا
وبطلها للأسف إنسان
لناس صاحية وناس نايمة
وناس للصح بقوا عميان
ضميرهم مات مع أخلاقهم
وحياتهم نرفزه وزهقان
تعالى بكاميرا نروح نرصد
صور شاذه تهد كيان
ونرسم صورة نحكيها
ونلون من الحياة ألوان
أول حكاية وأنا ماشى
قابلت شاب واقف سرحان
الواد حليم أبن بهانه
بيلف بانجو مع الدخان
في سيجارة دخانها مولع
وتايه فى الحياة توهان
واقف يزعق فى الشارع
وفاكر نفسه واد فنان
وعيونه حمرا زى الدم
من شكله بقيت قرفان
ومراته زهقت من عشته
واخواته زهقوا معاه قولان
وعيالة يبكوا لحد الصبح
وابنه يقوله يا أبويا جعان
ما البانجوا خلاص ضيع عقله
وزاد واحد على الإدمان
وأوضاع غريبة فى حتتنا
شجار على الفاضى والمليان
بين الاسطى رشاد ونفوسة
باين عليها كان بخلان
وكل همة فى الخمرا
وكل ليلة يرجع سكران
يشتم ويضرب فى عيالة
ومراته تشكى من الحرمان
وتقعد تحكى مع جيرانها
على جوزها واللى صابه كمان
ينام يهلوس من تعبه
ودمى يغلى ولا البركان
لمين يارب اروح اشكى
وانت علينا اله رحمن
وراجل عجوز قوى مدلع
عامل تسريحة بشكل جنان
بيحب جديد على مراته
بت صايعة اسمها أحسان
ومراتة مشغوله فى بيتها
وهو فى الهوى هيمان
وأغانى حب على الكاسيت
وهو بيغنى معاها كمان
لا همة تلامذه بيذاكروا
ولا سامع نداء لأذان
وتقوله يا جدوا ما يصحش
يعمل نفسه مش فهمان
وكأنه شاب بن العشرين
فى الحب يا عينى ولهان
والواد حميدة على الناصية
لامم شله من الشبان
كل اللى ماشية يعكسوها
دى بيضة وسمرا وجسم ملان
وان واحده وقفت قدامهم
فريرة يجروا وراها طيران
وكلام أباحة وبيجرح
وكأنهم من بيت خسران
وهى تدارى فى هدومها
وتقول منك لله يا شيطان
وحكاية فيفى الغلبانة
سالفة الموبايل من أشجان
وهات كلام تسمع منه
قابلنى يا روحى عند فلان
وفى الميعاد بقى يتقابلوا
وتقول تعبت من الهجران
ومره فى مرة تتعود
لا عاد كسوف ولا عاد خجلان
ونظرة لمسة ومسكة أيد
تروح فى سكة تضيع ضيعان
وترجع تقول خانى حبيبى
بعد ما زاغ منها زوغان
ولا الشباب ولعب الكورة
وسط الطريق والناس ماشين
وان خبطت ست معدية
يقولوا خلاص مش قاصدين
وزعيق وجرى فى الشارع
وكأنه نادى العاب فاكرين
وميه وسخة من البلكونه
حرام عليكوا الناس نايمين
بالطوب يردوا على الميه
وللأزار بالطوب كاسرين
وتقوم خناقة على الكورة
وكأنهم شله مجانين
وكل يوم بنشوف حكايات
يكتبنا ربنا مع الصابرين
وعجوزه عايشه بمفردها
فى قوضه يا دوب مترين
ما قدرة تعمل أكلتها
ما العمر عدى فوق سبعين
وعيالها عشرة بنسوانهم
تحلف تقول والله عايشين
من بعد أبوهم ما توفى
ولادى بقوا عليه قاسين
ما حد منهم يخدمنى
حتى الجنيه بقوا ماسكين
وابنى الصغير طال بعده
واخباره غابت من سنتين
ساعات أخيب وأقعد أدعى
وأخاف لقلبى يرد أمين
وساعات أنادى ولاد بطنى
وأحبس دموعى جوه العين
وست فاضة فى حتتنا
تقعد تنادى على أم حنان
تنزل معاها عيال خمسة
تكسير وخبط فى البيبان
وجنب حيطة ويتلموا
وهات نميمة على السكان
فلانة زعلت من جوزها
مع ان جوزها النبى شقيان
والبت سوكة هتطلق
علشان جوزها راجل خيبان
وأم سعيد ماكرة وصفرا
تقرص وتلبد كالتعبان
وأم سمير لابسة قميصها
فى البلكونه واقفة تمص لبان
والجارة دى مسكت جوزها
مع أم بطة مرات سمعان
ماسابوا واحده فى حتتنا
الا وحطوا عليها قطران
وقلت مرة اركب أتوبيس
لقيته زحمة بناس مليان
كبير وطالع اتسند
على حد واقف من الركبان
والطرقه زحمة وحر شديد
برجل واحده بقيت وقفان
لاشاب عاوز ينده لى
ولا حد راضى يفضى مكان
وست محشورة فى الزحمة
كرمتها قدامى بتتهان
قلت يا اسطى نزلنى
قالى المحطة فى الدوران
جت المحطة ما عرفت أنزل
رمونى فى الشارع حفيان
حكايات كتيره لو أحكيها
تضيق صدركوا من الأحزان
على اللى داير فى بلدنا
وكأنه مس من الشيطان
وعاوزنا نرجع زى زمان
قول للزمان ارجع يا زمان
ليست هناك تعليقات:
إرسال تعليق