لسه فاكر _بقلم الشاعر على مصطفى

لسه فاكر :-
=======
لسه فاكر ضحتك لمسة أيديكى
لسه فاكر دمعتك نظرة عنيكي
لما كنت أقوم ورايح المدرسة 
وما فيش فلوس
وأنتي عارفة أن الطريق
كان فيه سفر
وتحضنينى وتقليلي
يا واد بوس
ربنا يكفيك وتسلم م الخطر
واخد معايا
فى شنطتى الدمور رغيف
من غير غموس
مليان ببوس
أقصد طريقي فى دنيتي
وأنا واد نحيف
مليني خوف
وبعدى يومى
زى أيامي اللى فاتت
والجدة ماتت
فاكره ساعتها لما جيت
ولقيتكم قاعدين فى الصوان
سيبتى كل الناس عشانى
وقمتي تديني الحنان
وتطبطبي وتقولي ما تخافشي
دى راحت للجنان
وأسمعك وتخلصي
وتقولي عارف أيه كمان
ودموعي نازلة على حبيبتى جدتي
كانت حياتي ودنيتي
وتقولي ربك كان كريم
هون عليها بحكمته
وكان حنون
ما هو ربك الرحمن
كريم وكان رحيم
وتغمريني بأحلى حضن
كنت لى بر الأمان
عشان أذاكر
لسه فاكر
.
.
لسه فاكر لما قلتي
نفسي أشوفك يا ابنى ضابط
أو طبيب زى ابن عمك
اللى شايل بردة همك
يلا خلى حلمي ليك يبقى حلمك
كنتى بتقوى العزيمة
طيبة ملياكى وحليمة
وتشجعيني حبة حبة
وتغرقيني بحور محبة
وكنت من كرمك عليا
ومن كسوفي أستخبه
وتقوليلى أبقي ضابط
مرة واحدة !!
زى مين ؟؟
ابن عمى إبراهيم ؟
دا واد لئيم
سيبك انتى أنا هبقى ضابط
بس عارف الأصول
مش هبقى غول
دوغرى همشي وعندي دين
وأنصف المظلوم تملي
وانصر الحق الحزين
واجبر الظالم يقولى
الحق فين
كنت عاوزانى أذاكر
وابقي شاطر
لسه فاكر
.
.
حلمك أتحقق يا أمي
والنجوم فوق كتافي بقت حزينة
لما رحتى وفوتي قلبي
كنت عايزك يا أمينة
كنت عايزك تحضنيني
زى زمان
كان وجودك فى حياتي
شيء ضروري
كنت نوارة المكان
هو ده كان اتفاقنا
يوم ما حققت الأماني لحلمنا
كان يوم فرقنا
كان كلامنا عهد بينا
تفضلي دائماً معايا
لكن الظاهر نسينا
ما علينا واللى لينا
وحطتينى فى أمر واقع
مش بدافع
بس من غيرك يا غالية
تاهت مراكبي
والسفينة تلف بيا فى كل مينا
يا أمينة
دنيتي صبحت حزينة
والحياة من غير وجودك
مش كريمة
يا عظيمة
لسه فاكر

بقلمي ،،
على مصطفى ،،،