كل السطور ساكتين :: للشاعر : محمد ضياشه

كل السطور ساكتين
للشاعر : محمد ضياشه

كل الكلام جوانا اتكتب
مش باقى غير سطرين
سطر منهم بيبكى معايا
والتانى ما اعرف فين
ومش حابب يشوفنا كده
وفى الخطوة يزور بلدين
ويجى يحكيلى ماسيهم
ويحملنى حمول فاشلين
ويقولى خربوها فى غزة
وبكدا ضيعوا فلسطين
وداعش بنرسم حدودها
وأحنا مالينا ايدين
وفى سوريا بيتعاركوا
على مين مكانة فين
وفى اليمن نفس الروايه
صراع لناس جاهلين
وفى ليبيا شوفنا الخراب
من أعداء الوطن والدين
وفى كل بلد عربى
خلو بدل الطريق طريقين
أنا قلت كفايه يا سطرى
ماهتكفيك دموع غالين
وأنت يدوب كام كلمة
بيعزوا فى الرايحين
فبلاش تعملى بطل
وتدوخنى وراك للحين
وكل ساعة فى بلد
وفى كل حتة أنين
د أنت سطر فى كتابى
وكل السطور ساكتين
ماترحم بكايا شوية
وماتنسى بأننا واقفين
فى وسط غابة وحوش
فيها كل العرب تايهين
وماليهم فى القرار كلمة
فخلينا جوه الكتاب عايشين
لحسن يمسحوا سطورنا
ويمحوا تاريخ لسنين
ونبقى قتلنا الحضارة
بحبة كلاب ضالين
صرخ فى وشى السطر
وحلف عليا يمين
ليقف فى وش الظلم
ولو بحبة حروف صاحين
يصنع منهم قنابل
ودشم وحصن حصين
يحمى بيهم كتابة
ولو كل السطور نايمين