#جديد #عزف_ع_وتر_بكاي بقلم الشاعر احمد الماحي
فاكر وأنا عيل
تسبيح جدي ع الدكه
فاكر لما قلبي ميل
لعيونها في السكه
فاكر كل الكلام والحواديت
وفرحة لبس العيد الجديد
وفرقعت البومب
وضرب البلي
وطبخ الكرونب
بسمن القري
فاكر كل حاجه
كأنها أمبارح
فاكر شالها
والهوي بيضفر شعرها
والليل شارح
فاكر وأنا سارح
وماشي في الطريق
كتف ف كتف
كنت أنا والوحده فريق
والشريط بيسف
والقلب قايد حريق
والخوف بيلمس جوا روحي
والنبض مش برىء
يتنفس جروحي
يسكن بين الضلوع نوحي
وأصبح ف بحر الهموم غريق
تعدي السنين
وأشيب شوق وحنين
وادبل ذي الياسمين
ويبور بستاني
والذكره بتدور من تاني
وأرجع من تاني فاكر
وأرجع من تاني أناني
بسرق سبحة جدي
وعيونها ديما ضدي
والماتش مش ودي
الوحده بتزيد ف هجومها
وأنا لسه بعد في السما نجومها
وقاعد فوق سطوح بيتنا
فاكر وأنا عيل
مع ولاد حتتنا
والناس في الضهر بتقيل
واحنا في الضهر بنخيل
في المنزَل والشارع
وانا ماقدرش لا أهاجم ولا أدافع
وعيونها في الصيف هوي ساقع
وفي الضلمه والليل ضي ساطع
مكناش خيل وضلوعنا نخيل
ودموعنا في الفرح طابع
مكنتش بحبها
ولا بعشق أتقدم وأنا راجع
أستني قصاد كُليتها
مكنتش براجع
حساب التكس
لجل ألحق أسرق ف عيونها نظره
والناس تدسي م المطره
وأنا أعشق أجري تحتيها
مشاعر حلوه يا حبيبتي خدتيها
معرفش أذاي بالرخيص بعتيها
يا شايفين الدموع في عيني
دي مية قطره
زيف ذي حنيني
زيف ذي الخمره
زيف ذي اللي بيذاكر
وبيسقط ف الآمتحان
واللي ديما فاكر
أنه دايما نساي
محدش يقول ليه وأذاي ؟
سبحة جدي وعيونها
عزف ع وتر بكاي
ليست هناك تعليقات:
إرسال تعليق